برو ابائكم تبركم ابنائكم

قصة حكاها لي احد الاخوان

القصة تتحدث عن درس اراد الله ان يعلمة لزوجين من طفلهم الصغير اليكم القصة لتعتبرو

يحكي انة في احد الاحياء الراقية حيث تسكن الناس في الفيلل الراقية والحدائق الورافة يسكن زوجين في رغد من العيش وكان والد الزوج يسكن معهما في نفس الفيلا ولكن نسبة لظروفة الصحية وكبر سنة وحتي لا يشوة منظر الفيلا قد بنو لة غرفة خشبية صغيرة خلف الفيلا في ركن قصي بالحديقة وكان يقدمون لة الطعام علي اناء قديم بالي واستمر الحال علي ماهو علية لردحا من الزمان وعندما اراد الله ان يغير هذا الوضع الغير طبيعي فلنري ماذا حدث

كان لهذين الزوجين طفلا يحبانة حبا جمة في ذات يوم اختفي الطفل من الفيلا فبحثت عنة في كل الانحاء ولم تجدة فخرجت تبحث عنة في حديقة الفيلا فوجدتة بعد بحث مضني منهمك في صنع شي فاقتربت منه لتري ماذا يصنع فوجدتة يصنع من علبة لبن صدئة وبالية شيئا مستطيلا لم تفهم ماهو فسالتة ماذا تصنع ياحبيبي اتدرون ماذا قال لها قال (اصنع ياامي اناء لتاكلو فيهو انتي وابي عندما تكبرا )

اظلمت الدنيا في عينيها ودارت بها ثم استدركت انة يريد ان يصنع بي وبابية ماصنعنا بجدة حقا ان الجزاء من جنس العمل

فاسرعت الي الي الفيلا والتقطت سماعة التلفون واتصلت بزوجها تطلب منة الاسراع بالحضور ليري المستقبل الذي ينتظرهم .

اسرع الزوج بالحضور وقصت الزوجة القصة لزوجها وكان اول قرار يتخذانة نقل الجد الي افضل غرفة في الفيلا و اعطائة افضل انواع الطعام علي احسن اواني البيت

الجزاء من جنس العمل .برو ابائكم لتبركم ابنائكم .تذكر دائما ان ما تفعلة لابنائك قد فعل اضعافة والدك لاجل

لا تنتظرو ان يريكم الله في انفسكم واسرعوا بالتغيير

البوبار

البوبار مرض خطير اجتاح الشعب السوداني لا فرق بين( راجل ولا مرة )(كبير ولا صغير)( جاهل ولا متعلم ) كلو عايز يتفشخر ويتبوبر يعني شنو البوبار انك تشتري حاجة اكبر من مقدراتك المالية وانت اصلا ما محتاج ليها بغرض انك تدهش الناس الحواليك وتوريهم انك انتا زول مرتاح ومرطب.

يعني مثلا المراة تطلع روح راجلا عشان يجيب ليها توب تظهر بيهو في عرس ناس فلانة والناس يشوفو ويعلقوا عليهو ويبقي موضوع الحفلة و يغير ليها غرفة النوم في الوضوع والستاير وكم حاجة كدة عشان النسوان الجايات يباركن المولود يندهشن ويعلقن وطبعا هي بتكون قمة الانبساط والاهبل يسرق ينهب لازم يجيب يعني لازم يجيب عشان يقصر النقة و ما يمدو ليهو البوز .

اما العرس دا حقو برا قمة البوبار الشيلة من وين وكم دستة وكدي دهبو الجايبو وكدي الريحة اصلية ولاموية ودفع مهر كم تتفرجا حلة العريس والفاتن العرض يحصلن في حلة العروس يقلبوها قطعة قطعة عليكم الله دا كلام والله العظيم انا بكتب فيهو شعرتا بالخجل .

انتهت الشيلة يخشو في حنة العروس بمنو وكانت كيف وحنة العريس بمنوعشاءهم كيف .....الخ

اما بالنسبة للرجال فكل شهر الواحد لازم يغير الموبايل رغم انو مابيعرف يجيب نغاماتو من وين ولا بيعرف كل الحاجات الفي سطح المكتب بتاعت شنو وتلاقاهو يشكي ويبكي من الظروف الصعبة والعيشة البقت صعبة بالنسبة للموبايل جاءنا صاحب شركة ليها عدة فروع في العالم دخلو الشهري بساوي مرتبات حلة كاملة شايل موبايل 3310 سالناهو لية موبايلو موديل قديم قال بي خشم مليان الموبايل ليس اكثرمن وسيلة اتصال برسل وبيستقبل المكالمات الواردة

وفي نوع مستوي اعلي شوية بيتفشخر بالعربات كل شوية بيغير عربية ويملاها كشب وتلاقاهو مشغل الاستريو باعلي صوت لموسيقي اجنبية هوما فاهم حرف من كلماتها ولازم يكون شكلو غريب مبرم شعرو وبناطلينو اغرب. بنطلون ناصل فيهو كمية من الجيوب نظام شوفوني انا ود عز وكدة وضارب الرطوبة .

وفي بنات خشن بوبار العربات تلقي الواحدة مالية الضهرية ارانب ومخدات نظام البت رقيقة وحالمة ونظارات شمسية كبيرة وسماعات مركبة اربعة وعشرين ساعة نظام البت حبيبة وتلفوناتا كتيرة.

حتي الشفع الصغار اتعلمو الفشخرة والبوبار ناس ابوي جاب لينا تفاح وعنب وابوي جاب اتاري وليدو وانا ابوي جاب عجلة الامثلة كتيرة وما بتخلص

قال تعالي :- (ولا تمشي في الارض مرحا انك لن تخرق الارض ولن تبلغ الجبال طولا كل ذلك كان سيئه عند ربك مكروه( 17)صدق الله العظيم سورة الاسراء

وكما قال تعالي (وَلا تُصَعِّرْ خَدَّكَ لِلنَّاسِ وَلا تَمْشِ فِي الأَرْضِ مَرَحًا إِنَّ اللَّهَ لا يُحِبُّ كُلَّ مُخْتَالٍ فَخُور(18) اقْصِدْ فِي مَشْيِكَ وَاغْضُضْ مِن صَوْتِكَ إِنَّ أَنكَرَ الأَصْوَاتِ لَصَوْتُ الْحَمِيرِ(19) صدق الله العظيم سورةلقمان

اخوتي ان الله يكرة المختالين الفخورين في الاية (17) من سورة الاسراء ولا يحب كل مختال فخور في الايه (18) من سورة لقمان فتجنبو ما يكرة الله ولايحبة وحسبي ,لا اقول بعد الله تعالي شيئا والعاقل ينجو بنفسة من هذة المصيبة الكبيرة

عقدة المراءه المطلقه

ذكرني بهذا الموضوع قصة حكاها احد الاصدقاء عن اعجابة بفتاة مليحة ممشوقة القوام لاترفع عينيها عن الارض عند تمشي وليست كبقية الفتيات اللائي يتلفتن في الطريق كسائقي التاكسي بصراحة اعجبتة تصرفاتها واخلاقها فراح يبحث عن شخص يعرفها ليسال عنها وعن اهلها وبعد جهد جهيد وجد صديق لصديقة يسكن جوارهم وعندما سالوهو عنها كانت اجابتة مختصرة اول شئ هي مطلقة اذا تقبل الزواج من مطلقة فاهلها طيبون لاغبار عليهم قال صديقي انه اصيب بصدمة وقال له لاتكمل فمبداء الزواج من مطلقة لن ارضي به مناساسة فشكروة وانطلقوا لا يلون علي شي

حاولت ان اناقشة في الامر فكانت اجابتة :- تخيل انها امراة عاشت مع رجل اخر من قبل فكيف اضمن انها لن تعقد حياتي وانا افكر في كل لحظة وكل تصرف من انها تقارن بيني وبين زوجها السابق في كل شي في لبسي في عطري في انفعالاتي .....الخ .

تخيل نفسك وانت موضوع في مقارنة مع شخص اخر ليس مسموح ان تدافع عن نفسك ولا ان تبرر تصرفاتك لان المقارنة ليست علنية وانما هي مقارنة تدور داخل راسها .وولو اعلنتها المصيبة اكبر فستكون سبب لكارثة فانا لن اسمح لها بان تذكر اسمة في بيتي دعك من ان تقارن بيني وبينة في العلن.

اخي لما لا اتزوج امراة اكون انا اول رجل في حياتها كل ماتعرفه عن الرجال مصدرة انا وكل افعله انا تحسبة الشي الطبيعي الذي يفعلة الازواج لانها لاتقارن .

في الحقيقة اقنعتني مبرراتة ولكني سالتة سؤال طيب مازنب المسكينة اذلم تكن هي سببا في الطلاق وهي كما تقول مكملة من ناحية الخلقة والاخلاق ؟

اجاب ذنبها انها ولدت في مجمتع ينظر للمراة المطلقة كمجرمة ولو لاعيب فيها لما طلقت دعك من المجتمع حتي اهلها ينظرون لها بمنظار اسود وانها لم تكن جديرة بالمحافظة علي بيتها والصبر علي زوجها مهما كنت خصايلة وفعايلة بدلا من ان تحمل لقب مطلقة.

اخي انا اعلم انها لاذنب لها ولكني احد افراد هذا المجتمع الذي تربي علي هذة المعتقدات الخاطئة ولكل الاسباب التي ذكرتها سابقا لا استطيع التعايش مع عقدة المراة المطلقة

الموضوع مطروح للنقاش

اكرم والديك ليكرمك ابنائك

ذكرني بهذا قصة حكاها لي احد الاخوان

القصة تتحدث عن درس اراد الله ان يعلمة لزوجين من طفلهم الصغير اليكم القصة لتعتبرو

يحكي انة في احد الاحياء الراقية حيث تسكن الناس في الفيلل الراقية والحدائق الورافة يسكن زوجين في رغد من العيش وكان والد الزوج يسكن معهما في نفس الفيلا ولكن نسبة لظروفة الصحية وكبر سنة وحتي لا يشوة منظر الفيلا قد بنو لة غرفة خشبية صغيرة خلف الفيلا في ركن قصي بالحديقة وكان يقدمون لة الطعام علي اناء قديم بالي واستمر الحال علي ماهو علية لردحا من الزمان وعندما اراد الله ان يغير هذا الوضع الغير طبيعي فلنري ماذا حدث

كان لهذين الزوجين طفلا يحبانة حبا جمة في ذات يوم اختفي الطفل من الفيلا فبحثت عنة في كل الانحاء ولم تجدة فخرجت تبحث عنة في حديقة الفيلا فوجدتة بعد بحث مضني منهمك في صنع شي فاقتربت منه لتري ماذا يصنع فوجدتة يصنع من علبة لبن صدئة وبالية شيئا مستطيلا لم تفهم ماهو فسالتة ماذا تصنع ياحبيبي اتدرون ماذا قال لها قال (اصنع ياامي اناء لتاكلو فيهو انتي وابي عندما تكبرا )

اظلمت الدنيا في عينيها ودارت بها ثم استدركت انة يريد ان يصنع بي وبابية ماصنعنا بجدة حقا ان الجزاء من جنس العمل

فاسرعت الي الي الفيلا والتقطت سماعة التلفون واتصلت بزوجها تطلب منة الاسراع بالحضور ليري المستقبل الذي ينتظرهم .

اسرع الزوج بالحضور وقصت الزوجة القصة لزوجها وكان اول قرار يتخذانة نقل الجد الي افضل غرفة في الفيلا و اعطائة افضل انواع الطعام علي احسن اواني البيت

الجزاء من جنس العمل .برو ابائكم لتبركم ابنائكم .تذكر دائما ان ما تفعلة لابنائك قد فعل اضعافة والدك لاجل

لا تنتظرو ان يريكم الله في انفسكم واسرعوا بالتغيير

دموع الرجال الغاليه

اذا بكت المراة فالامر جد عادي فالدموع سلاح المراة الذي تشهره دوما في وجهة الرجل تستلين بة قلب الرجل وتستدر بة عطفة اما اذا بكي الرجل فاعلمو انه قد تالم حقيقة وان الامر جلل والمصاب عظيم

الدموع احدي نعم الله العظيمة علي عبادة فهي تلين القلوب تعبر عن الالم وتخفف الضغوط وتبرد الاحزان كما انها تفرغ الاملاح الزائدة وتنظف العيون

بعض الرجال يحسبون ان البكاء ضعف ولين ولايبكون ابدا وهذا احد اسباب الامراض السائدة في هذة الايام (الضغط –السكري –القلب ) وهنالك احصائيات ان اغلب المصابين بضغط الدم الغير متوراث من الرجال وان النساء لايصبن به لانهن يفرغن ضغوطهن بالدموع

متي يبكي الرجل عند موت عزيز له وفقده عند شعوره بالظلم أو نتيجة ضغوط الحياةعندما يعجز عن حل مشكل

وهو في حالة خشوع لله (سبحانه وتعالي) أو لشعوره بالندم

عزيزي الرجل لست أخير ولا أفضل من عظماء هملت دموعهم مدراراً. فعمر بن الخطاب بكل قوته ومكانته، وهو الذي نقل الدعوة المحمدية من المرحلة السرية إلى المرحلة الجهرية، لا يخجل أن يبكي ويخبر عن بكائه من حادثة وأد ابنته في الجاهلية، ومحمد رسول الله صلى الله عليه وسلم من قيل انه بقوة ثلاثين رجلاً، وقائد الأمة وقدوتها كان يبكي من خشية الله، ويقول إن البكاء لين للقلب، ويوصي المسلمين بالتباكي حتى الوصول للبكاء عند قراءة القرآن.

هل تبكي يا ادم ام تعتبر البكاء ضعف ؟

هل تعتبر حواء بكاء ادم ضعف وينقص من رجولتة ؟

انا شخصيا بكيت وفاة ابي حتي جفت دموعي ولم تنزل مني دمعة الا لحظة عقد قران اختي الكبري وذلك ايضا لاني تذكرت ابي وتمنيتة لوكان حاضرا ثم بكيت يوم زواجي ويوم مولد طفلي الاول تبكيني لحظات الاحساس بالظلم وعدم القدرة علي التصرف ويبكيني الفراق ابكي وحدي حتي لا يري احد دموعي ثم اتذكر اني رجل ولا يجوز بكاء الرجال فامسح دموعي واتظاهر بالصلابة

انا لا اجيد الكتابة ولكن مااعيشة من الام يجعل لدي وقود كافي يدفعني لمحاولة الكتابة فانا منذ اربع سنين مضت انشد الاستقرار في مكان واحد فحياتي سفر وترحال اغيب عن اطفالي بالشهور واعود اليهم وانا احمل الاشواق والاموال فينظرون الي نظرة غريب يعرفونة واحتاج لايام وايام لامد جسور من التواصل بيني وبينهم وما ان تبدا الالفة بيننا حتي يحين موعد الرحيل فاحزم حقايبي وابدا الرحيل تتنازعني مشاعر شتي هل هذا الذي افعله صحيح؟ هل تعيش الناس هكذا؟ احاول ان اقنع نفسي بان هذا من اجل مستقبلهم واقارن بيني وبين المغتربين الذين يغيبون بالسنين واقول لنفسي انا حالي افضل منهم بكثير ولكن هذا كلام لاخفف به عن نفسي وانا بيني وبين نفسي مقتنع بان هذا ليس هو الصحيح فهنالك ناس يعيشونها بالكسرة والملح وهم سعداء يعيشون بين ابنائهم يفرحون لفرحهم ويحزنون لحزنهم يرونهم يكبرون امامهم كل يوم .

هولاء يكبرون واولئك يكبرون هولاء عاشوا مع ابيهم يشعرون بالدف لان هناك من يحميهم رغم انهم لا يملكون البيت الملك الذي ياوئهم واولئك يكبرون ويادبهم الف شخص (خالهم)و( عمهم) وابيهم في البعيد يبحث عن مال البيت الملك وسترة اخر العمر ايهما صحيح افيدوني افادكم الله

اخ يطلب يد محبوبة اخيه موقف صعب

حكي لي احد الاصدقاء وهو الاخ التاني في اسرتهم من انة كان يعيش قصة حب منذ الصغر مع ابنة عمة ويخطط للزواج منها الا انة في يوم من الايام جاء اخوة الاكبر الذي هو في مكانة ابوة منذ وفاة والدهم يشاورة في رغبتة الزواج من محبوبتة اسودت الدنيا في عينية ايضحي بحب عمرة لاجل اخية الذي يحبة جدا ام يخبرة بانة يحبها ويحتفظ بحب عمرة ولا يدري ماذا تكون ردة فعل اخية اتصل بمحبوبتة ليخبرها ويشاورها فكان ردها واضح بانها سترفض فقال لها حتي لورفضتي ستزيد المشكلة تعقيدا فهل ستقبل اسرتة طلب يد من رفضت ابيهم اخيهم المحبوب اتدرون ماذا فعل ؟

اخبرني انت ماذا ستفعل لوكنت في نفس الموقف ؟

البايركس ضحايا الطموح الزائد

الام :- سعاد ... يابت يا سعاد .... سعااااااااااااااااااااااااااد هوي يابت خلي تقلت دمك دي وتعالي لي هنا

سعاد :- اهااا ياامي جيتك في شنو

الام :- الشنينه ام قرينات عليك الله شوف البت تقولي هي الوالداني

سعاد :- معليش ياامي ماقاصده لكن عندي قراية

الام :- اسمعي الكلام دا ابوكي قال يشاوروكي عمك طلبك لي ولدو عثمان انتي رايك شنو

سعاد :- اسمعي ياامي الف مرة انا قلت ليك سيرة العرس دي ماتجيبيها لي انا لو ماقريت الجامعه واشتغلت في وظيفة محترمة ما بتزوج وبعدين عثمان شنو البعرسو انا لازم اتزوج واحد هيمة وعليهو القيمة عثمان دا حتة موظف ماعندو غير ماهيتو انا احلامي اكبر من كدة .

الام :- يا بنتي انا امك اكبر منك واعرف منك البنت عندها عمر محدد بتكون فيهو ذي الزهرة المفتحة ودي الفترة البيطلبوها فيها العرسان وتكون مرغوبة فيها لوعدت الفترة دي بدون ما تتعرسي الله اعلم العريس البيجيك بعد داك الا يكون معرس ومطلق ولا مرتو ميتة ولا طمعان في وظيفتك وقروشك يعني تابي عريس موظف بي قروشو تجيبي عامل بي قروشك

طبعا سعاد رفضت كلام امها جملة وتفصيلا ورفضت عثمان اللي اتزوج بعد شهر واحد من بنت الجيران

سعاد واصلت القراية ورفضت عرسان بالجملة واشتغلت موظفة في بنك ومركزة شديد في شغلها ودا طبعا كان سبب في سرعة ترقيها في البنك لمن وصلت مراقب مالي

تقريبا اتحققت كل الاحلام الا حلم واحد كان مؤجل وفات الاوان حلم البيت والاسرة والاطفال سرقها العمر وهي بتلهث وراء الاحلام الكبيره اتوقف قطر العرسان الراغبين واتذكرت كلام امها القبيل واتطبقت فيها النظرية الفلسفية (نظرية الحمار والجزرة ) وطبعا النظرية انو الحمار بيربطو ليه جزره قدامو ويرفعو ليه الاثقال في ظهره ويفضل ماشي عايز يلحق الجزرة رغم انو الطريق مليان حشائش ما بيشوفها لانو مركز مع الجزرة لحدي مايوصل البضاعه احتمال صاحب الحمار يديهو الجزره واحتمال ياكلها صاحب الحمار والنظرية مقصود بيها الانسان البيفكر في المستقبل علي حساب الحاضر يفضل جاري وورا الجزرة ويفوت الحشائش القدامو

1- هل كل البايركس هن ضحايا الطموح الزايد

2- ام البايركس ضحايا تمني الاهل لعريس يدفع سعر كويس ويشيل

3- ام ان البايركس هن ضحايا العادات والتقاليد

طبعا انا تعاملت مع الموضوع من جانب واحد وهو جانب الطموح ياريت الشباب يتناولو باقي الجوانب

يحب الرجل بقلبة ويتزوج بعقل ابية

يحب الرجل بقلبة ويتزوج بعقل ابية

عن تجربة شخصية وتجارب اصدقاء اكتشفت صحة هذة المقولة تختلف مواصفات الحبيبة عن مواصفات الزوجة شتان مابين هذة وتلك فالاولي كانت في مقتبل العمر واهم شروطها ان تكون مليحة الوجة ممشوقة القوام .....الخ اي بمعني اصح ان تكون جيدة التغليف .

اما الثانية فلابد من ان تكون صبورة -طيبة -مطيعة .....الخ اي بمعني اصح مرة بيت شفتو الفرق كيف

قد يختلف معي كثيرون ويتفق معي اكثر .رايكم بصراحة

خلف الابواب المغلقه

ماذا يحدث خلف الابواب

سمعت صوت جيرانك الرجل وزوجتة احتد النقاش بينهما وبلغ الغضب بالزوج حتي صفع زوجتة وبدات بالصراخ والنحيب تتصرف كيف تذهب وتتطرق الباب وتسال انشاء الله خير الزوج راجل عاقل وبيحترمك ممكن يقولك لا بس نقاش عادي وانتهي

وممكن يقول ليك انتا الخصاك شنو مرتي انشاء الله اذبحها ممكن يلقاها فرصة لو هو زهجان منك في موضوع قديم ويضاربك عديل ولو اشتكيت ممكن يعتبر تعدي منزل عديل

ممكن الجارات يلقن الموضوع ونسة الاسبوع فلانه دقوها وفلان مشي يحجز احرجوهو وقالو ليهو انت الجابك شنو

ممكن تسمع صوت طفل الجيران احد والديه يضربة لتاديبة والطفل يصرخ بصوت عالي هل تتدخل وتحلف علي جارك ان يسيبو المرة دي عشان خاطرك

مواقف عاديه وممكن تحصل في أي لحظة

كيف التصرف ؟

مايحدث خلف الابواب شان خاص هل من حقنا التدخل بغرض الصلح

البت كان طلقوها السبب امها

البت كان طلقوها السبب امها

اغلب حالات الطلاق البتحصل بتكون لاسباب ناتجه عن السلوك والطباع والتربيه

وذي مابقولو اهلنا البنيه من اماتها

ودي حقيقه كبيره لان البت بتحاول تعيد تجربة امها بكل تفاصيلها الممله مع زوجها

او عادة بتكون ساعه ملي بزمبلك

تمشي ناس امها وترجع ما ياها الزمان

ولو دققت في حالات الطلاق تكتشف انها حصلت غالبها بعد رجوع البت من زيارة لناس امها

والبلاده في الموضوع انها تبدا تطبق في الوصايا من هي راجعه من ناس امها لدرجة انو الراجل بيكون شايف زوجتو بتتكلم بلسان امها وما ملاحظه لنفسها لدرجة انو يتخيل ليهو انو البتتكلم دي حماتو ما مرتو

مرات كتيره يتخيل ليك ان الامهات ديل مابدورن مصلحة بناتن (ليه ما بيعمل ليك ذي باقي النسوان )(وراجلك لازم تنضفي من القرش والتعريفه لانو كان وفر ليهو قروش بيفكر في التانيه )(ويامامنا الراجل ويامامنا المويه في الغربال )عليكم الله دا كلام زول عاقل بيفكر في مصلحه الزول البيقولو ليهو

والاغرب في الموضوع ان الواحده بتلغي علمها وشهادتها في المواضيع دي وتتعامل بعقليه امها الشافت الكتب اول مره لمن اولادها خشو المدرسه

مع احترامنا لامهاتنا وتجربتهن في الحياة وخبرتهن في الحياه لكن الحياه اتغيرت والمفاهيم والسلوكيات والناس بتحاول تبني حياته علي اسس علميه من الكتب المتخصصه في امور ذي دي لكنها بتصدم مع تدخل الامهات في المواضيع دي

رايكم بصراحه في الموضوع