اقبض طرف توب السعاده
اوعي برد الهم يضربك
اقبضو اتحاوي فيهو
ارجي ربنا بيسعدك
اسعي و اوكل كل امورك
تلقي جنبك يسندك
الحزن وان طال بيرحل
ان سعيتو بيمرضك
يجردك من الاماني
من كل جميل راح يبعدك 
ببقي حارسك يرصدك
اضرب الهم بالفرح
وعيش حياتك ودنيتك
ازرع الحب والتفاؤل
تجني راحة مرقدك
بالامل في الله وحدو تلقي غاية مقصدك
ماتامل في بشر ماعندو ليك شئ بيوعدك
و يخذلك ليك ما بيوفي حتي ممكن يحسدك
رغم المراره دي الحقيقه

البحظرك دا اكيد شقي
وين انت زيك بتلقي
ياصفوة العسل النقي
غالبا تكون حصلت غلط
وهسي بيكون سافي التراب
وياجنا ياركب الزلط
معقول يحظروك يالسمح
يااحلي من لون القمح
بعدك بيكون يوم ما فرح
معقول يحظروك يا ام وجن
يالفرصه يا خلاصة اللبن
البحظرك يمشي المصحه او السجن
# اسامه سعيد ابو الباشق  #

ههههههههه يا حليل زمن المدرسه دي ورقه في كراس قديم
# اوراق ملقيه #
رجيناكي انا واشواقي واللهفه
حنسنا الصبر يقعد زهج قالينا ياخي كفي
فضلنا وشوقي منتظرين ملت و فاتت اللهفه
وحتي اشواقي خلتني براي واخدت اللفه
رجيتك والامل جواي لكن المكان طفي
رحل حتي الامل سابني ولمن طالت الوقفه
جدعتا علبة البينسون قعدتا دنكلتا لي سفه

وكتين وصلت الاربعين
خليك زول راسي ورزين
شوف بيت حلالك واستعين
بالمولي رب العالمين
ماتبقي زي عبد المعين
طول يومو حاشي البنطلون
ولون القميص يا الله عين
صبغة شعر وكريم يدين
سلسل دهب ولبانتو طق طق يا معين
وطول ليلو حايم في البحر
داير يشاغل ناس سحر
شغال يوزع في الرقم
للجكسي والكناس يخم
شايلو موبايل كبير مفتاح وعامل زول مهم
يوم بالغلط جدع الرقم للبت منال
ضربتو كان راجل تعال
بالباب عديل زي الرجال
اطلبني زوجه وام عيال
قاليها يابت الحلال
طلبك محال
لاني راجل ابوعيال
ابوعيال
مادمت انت ابوعيال
مالك بتلعب بالحبال
حايم مباري ليك جهال
ياعمو مالا زوجتك
والله حلوه وست جمال
طيبه وخلوقه وبت رجال
طيب اكيد فيك الغلط
طايرات عيونك  ياكمال
الزيك انت مفروض يزال
من الارض ويمشي الجبال

#قصاصات ملقيه #

اقداري لو لي فيها ايد والله كنتا بغيرا
ويالسمحه لو لوكتي الصبر
ظروفي جاري ابدلا
وريني كت لاحق شنو
خلاك تبيع زول اشتري
*************
والله كنتا رويحتي فيك
عاشقك متيم مشتهيك
احلامي كانت ليك وبيك
رغم الحصل ما بكيت عليك
لاني صدمتا فجعتا فيك 
*****************
اكبر مشاكلك تحسبا
وصوت العقل عندك ابا
وحسمتا امرك وضربا
وكانت نتيجتك مرعبه
********★*★★
واكبر مشاكلي معاك كيف
بتختني لي زول رزيف
ان شاء الله تسعد ياحريف

بنيه شرقية الملامح
في مشيها  كمهر جامح
تلفتك بالرغم عنك
تجبرك تنظر تصابح
بسيطه ما متكلفه
انوثه طاقيه مع الكوابح
والعيون من خلف توبها
تخبرك باقي الملامح

ياسمحه صورتك ظلمتك
كان دهشه يوم شفتك عديل
كان حاجه اغرب للخيال
بل حاجه زي المستحيل
مابين مصدق ومندهش
مابين مكذب ومستحيل
معقوله انسانه وبشر
ولا انت جن ضل السبيل
عجبك شنو في خلقتي
وريني يا حلمي الجميل
يانجمة وقعت ولعت
ضؤت ظلام ليلي الطويل
واحترتا حار بي الدليل
مابين جمالك وروعتك
والفتنه و الحسن الاصيل
اعجبتا بي صنع الجليل

************** 
سرحتا مره مع الحواجب
والف مره مع العيون
وخشيمك الفات العنب
رقه ونداوه حلا ولون
وحتي البياض الفي سنون
زي لونو مالاقاني لون
والبشره زي لون الدهب
والحكمه وجنات فيها نون
وحديثها زي صوت الكمان
هادي وحزايني وكيف حنون
بديت افكر انسحب
قبال زماني لي يخون
فتشتا لي درب المروق
مالقيتو خانني العيون
ماقدرت انطق فد حرف
لاقدرتا اضحك ياحنون
ياحاجه فوق الاحتمال
ياحاجه لايمكن تكون
احسن افارقك هسي دي
قبال اصدق ولي ما تكون
قررتا ابرح  سكتك
قبال اصاب يوم بالجنون

جميل وراقي مرهف
رقيق فتان واهيف
عيون اذتني ضمه قلبي قرب يوقف
زينون رموشا اصلي جهرني لما رفرف
لو بسم تكلم حديثو كالبلال ومن الكناري اظرف
 جسيم نديان و ناعم  من القطيفه الطف
قتلني بالمعاطف وجوز سلاح مستف
تتني في مشيها طبيعي ما مزيف
دلال غنج طبيعي تحسو ما مكلف
وسط تلال ووديان خصر عرضو كالكف
وللبدور يقارن من لوشي زاتا اقيف
والباقي ما بقولو بخاف تقيفو في الصف

نجاضه ياست البنات
ياخ هيترك كم الف واط
حرق سلوكنا وليها جاط
الارضي lose فاقد الرباط
الجاءك قريب اتوفي مات


السمحه ياست الحريم
لابدره لاجل لا كريم
يا الحلوه لو عندك فريم
غطي الجواهر كون رحيم
لايجهرنو يقوم  اهيم
بي شخصك الراقي الفخيم

خليك بعيد ماتكون متاح
قربك شقي وبعدك كفاح

لنساء الكون قاطبة
 تحياتي
ارفع قبعتي فخرا
لوجودك امي بحياتي
 اعظم امراة اعرفها
في الزمن القادم والاتي
يامن منها عرفت الحب
وبحبها تهتف خلجاتي
ضحت من اجلي واخواتي
بجميل العمر ولم تبخل يوما
 اهدتنا احلي السنوات
لاندري متي كانت تحزن
دوما تهدينا البسمات
وتقهقه دوما ضاحكة
تسخر من زمن النكبات
لاتظهر ضعفا او حزن
حتي في اقسي اللحظات
 امي ياحبي ياعمري
اهديكي اكبر باقة ورد
في عيد المراة يا حياتي
وكذلك حبي قبلاتي

سلامتك يمه بعد الشر عليكي
يانبع الحنان رب العباد يشفيكي
يانور العيون من الوجع يبرئيكي
ولو بالايد وممكن والله العظيم افديكي
ولو بالمستطاع  جسمي بيشيلى الفيكي
او كان بالقروش  ترخص قليله عليكي
كفاره ذنوب عافيه واجر تكسيكي
 وعكه صغيره ماكنت تاثر فيكي
ولو ماكان شديد حبة وجع ترميكي
بعد دا الحال تقومي رب العباد يشفيكي
يا اطيب قلب وعندك عفو والديكي

ديل انصاف رجال والله موتهم اخير
تلقي الزول ديوث لي عرضو ما بيغير
تلقي ام العيال جنب بابو لابسه السير
فاجره وصوتها عالي تهرشه قلبو يطير
*********** 
وتلقي عريس جديد عروسه لابسه الشاشه
كاشف للتحت لابسالا تحتو قماشه
لابتستر  عرض والعيون نهاشه
فرحان  العوير عرضك وسط شماشه
احسم هسي قبال تشيل القفه بي نتماشه
*******&
ولو جيت للشباب والله حالتن شينه
مابتفرز عديل من كعب بي هينه
نتيف حواجب وسبسيب شعر و ليونه
قميصه بلوزه  ناصل بنطلونه تحت كرعينه
عامل روج ولابس طرحه ايه الفرق ياخينه
بينك  وبين اخيتك المسكينه
بقيت انت السمح وهي الدشنه المبهدله شينه
********
ربنا يصلح الحال ويصلح عمايل خلقو
ابو الباشق بريء من دي العمايل ينجو
الباشق سعيد المهتدي وحلويه
 وكل امة محمد بي ايدو الكريمه ان شاء الله  نسقي المويه

شفتا من ريدك شقاوه
لما صعبت علي نفسي
لما ابذل ليك عواطف
وانت لا هنا لا بتحسي
عايشه في دنياك تايهه
لاعواطفك داير ترسي
يوم حنينه وياما تقسي
مره تنبهل المشاعر
وياما تاني كتير تدسي
ياما اهديتك محبه
نابعه من جواي انسي
 تاني ما بيفيد عتابك
الله يهديك مره ارسي

مالك ياعيد ما زي كل عيد
جيت زي كل عام وين ست الريد
الزوله الكان بتحلي العيد
الزوله الفرحه مسام ووريد
حبوبه الحب مابكفي قصيد
شان اشرح حالنا وراك يفيد
وجعك والله  عميق و شديد
مابنقص بل كل يوم بيزيد
يا اجمل زول فتينا بعيد
فقدك يالسيده اليم وعنيد
بكي الاطفال جيران  وحفيد 
السنه دي العيد ما زي كل عيد
مفتقد الحب مفتقد الريد

ليت لي ريشة بيكاسو
 كي ارسم لوحة خديك
او املك موهبة قباني
كي اكتب شعرا في شفتيك
او املك مزمار وردي
لاغني اغاني الحب اليك
 لكن لا املك الا قلبا
صرعته سهام عينيك
اردته فصار يحج اليك
اتامل فيك فلا اشبع
من وجدي من لهفي عليك
 اتمزق شوقا سيدتي
وانا في حضرة عينيك
ماهذا الحب المعتوه
يجرفني يسلبني عقلي
يحرقني حيا بين يديك

ياقاضي الغرام تحكم علي او تسجن
 ما بتفرق كتير اصلو العلي بيجنن
مفطوم اللبن ما بسكتوا بي مسكن
يبكي ويتنخج  طول ليلو يقعد يهنهن
حمي مع الصداع حالة طفل بيسنن
من شوق الحبيب حالتن عليهو تحنن

حبة حروف اتشكلت
كونت اجمل اسم
حبة خطوط اتمازجت
اتشكلت اجمل رسم
لما القلوب اتوالفت
كانت نواة اجمل حلم
اصلو القلوب لمن تحب
تجفا المضاجع تنحرم
يبقي السهر افضل نديم
واللهفه والشوق والنجم

نتوه في سكة الأقدار 
نحتار والكريم يختار
اكيد الخير فيما اختار
تنشن انت في نجمه
وترزق زينة  الاقمار
لكن للقلوب اسرار
تعشق للنجوم والنار
وتتهيب ضياء الاقمار

بنتغافل ونتغابي
ونعمل فيها ماعارفين
عشان نحفظ ودادكم دوم
نعمل فيها ما شايفين
لما بقينا بي وشين
لكن الوجع كيمان 
ليكم مابنقول الشين
نضحك نحنا موجوعين
بنتحمل ونظهر انو متماسكين
عشانكم انتو يا حلوين
عليكم الله تنسونا وننساكم
وتصبحوا زكري مجبورين

انا عمري جنبك ياشفيف
و بدونك الايام تقيـــف
اسقيني من فيضك حنان
ارويني يا مطر الخريف
ما اصلها الساعات بلاك
واقفه وممله و يا لطيف

انا عمري جنبك ياشفيف
و بدونك الايام تقيـــف
اسقيني من فيضك حنان
ارويني يا مطر الخريف
ما اصلها الساعات بلاك
واقفه وممله و يا لطيف

مرحبتين حبابك يمه ضويتي المكان

نورك يمه فجه  العتمه يا قمر الزمان
حمد الله بسلامتك يمه يانبع الحنان
اسعدت الفؤاد رؤياك حسيت بالأمان
 مبروك علينا شفاك رب العباد عافاك
من الشرور  نجاك غاية مناي رضاك
ليك روحي يمه فداك بعشق تراب قدماك

مشكلتي اول ما رايت روعك جمالك وفتنتك
 اتدربكت كل الحواس يوم  شافتك
واتشربكت كل السلوك جاطت علي وعشقتك
واتخيلت انك تكون صنو الفؤاد اتمنتك
اتنفست عشقك شهيق
يا اكسجين ما زفرتك
خافت عليك من العيون
غارت عليك  عشقتك
لكن ظروفو القاسيه منعت حجبتك
خلاك مجبر لا بطل
كرهان ظروفنا المنعتك
من الوصال من رؤيتك
يتمني شوفتك في الخيال
تسعد رويحتو الرادتك
 يتمني ليك كل الهناء 
واعذارو لو ما ارضتك
يكفيهو عشقك يسعدو
لو قسمتو ما ادتك
مرات امانينا بتكون
اكبر من الواقع عديل
واحلامنا شبه المستحيل
ارحم قلوبنا الحبتك
#ابو الباشق#
11 مارس 2019

الروعه في عيون البشوف
والروعه في الزول البحس نبض الحروف
الروعه منبعها منكم وبيكم تطوف
شكري الجميل لكل زول مر من هنا جاملنا بي تعليق ولوف
ان شاء الله ربنا يكرموا لايشوف ضنا ولا يلاقي خوف

لما تصبح ضيئ عيوني
وتبقي شهقاتك وزفيري
لما تتوسد فؤادي
تمتلك حسي وشعوري
لما تصبح نور حياتي
تبقي ناري وتبقي نوري
لما تخدعني الاماني
وابقي رابط بيك مصيري
فجاءه تتلاشي الاماني
وانت تصبح مستحيلي
ابقي مشتاق ليك دائما
والوجع يصبح سميري

انا ما نسيتك عشان
 تسالني لو متذكرك
متوسد الروح و الفؤاد جواي هناك
محكرك وموكرك
لوخبره في لغة العيون كان شفتا كيف دمعن كيف انتشن لذكرتك
وما كان جرحتا قلب معذب
 يهواك  يريدك يعشقك
اصلو الفراق لينا انكتب
 لارغبتي ولا رغبتك
 كان قسمتي ايضا كذلك قسمتك
ورضينا بي حكم القدر
 وامنا بي حكم الظروف
 ياربي صبرك وحكمتك

تسقط بس
عشان ليلك ظلام دمس
وتسقط بس
عشان بعتا البلد بالدس
وتسقط بس
عشان اطفالنا تلقي المس
وتسقط بس 
عشان مكسورنا يتجبص
وتسقط بس
عشان بنوتنا تتعرس
وتسقط بس
لانو الشعب اتجرس
تسقط بس
عشان الفقراء تلقي عدس
تسقط بس
انت وقططك الخلص 
عشان كذاب ورقاص بس

تلملم انت في الدولار
وشعبك في البنوك محتار
يشيلن لحمه ولاخضار
مخلد انت في الدنيا
و لا خلاص ضمنت النار
تكضب لينا ليل ونهار
نسيت الواحد القهار
تبيع الدنيا بالاخره
احذر غضبة الجبار
بطانتك غشتك ضليت
لا لقيت دنيا
 لا لقيت نار
تتاجر بي حليب اطفالنا
وتلعب بالدواء الدوار
فسادكم لا حصل لاصار
عليكم الله انتو بشر
زي خلق الله ناس احرار
تحللوا في الحرام قاعدين
دمرتو البلد دي دمار
تغشوا الناس بإسم الدين
وانتم لا خلق لا دين
تنكلوا انتو في الدنيا
وفي جهنم كمان خالدين
# أبو الباشق#

سقطت رغم الجبروت
رغما عن انف الطاغوت
يوم شعبك قرر انو تفوت
مابتقعد تاني لو احنا نموت
بإسم الدين هدمت بيوت
ترقص انت واطفالنا تموت
دولار الدواء عندك مربوط
والما عندو ان شاء الله يموت
وين التعليم الكان المجان
 اصبح في عهدك للمبسوط
ذليتنا نفتش نحن القوت
ومن صف لي صف يوماتي نجوط
مستمتع انت واخوانك
تنهبوا في الوطن المكبوت
كملت صبرنا معاك كذاب فاسد من يومك زول مسخوت
تسقط ياساقط  تاريخك وسختوا بي وسخ الورق البنك نوت
جوعت الشعب الطيبان 
لاخفت الرب لا طريت الموت
لانلت الدنيا ولا الاخره من وطنك شخص مطرود
لاهيبه تزينك لا سلطه
خائن من شغلك مرفود
لا حاضر عندك لا ماضي
لا عملا عند الله شهود
ينجيك في اليوم الموعود
حجاج القرن العشرين
يا قاتل شعبك عمدا
 يا ويلك من المعبود

مكتوب علي جمرة هواك تفضل مشكنه في الضلوع
لادايري تهمد  تنطفي وتصبح رماد
لاداير يقيف سيل الدموع
لاقادر اوقدها تبقي نار ظروفنا احرقت الجذوع
اقدرانا انو نحب بعض من غير  امل
 انسد نفاج الرجوع
 حاطوه بي خندق عميق زروبوه بي شوك الكتر شديتو بي حبل الصبر ضويتو بي خيط الشموع

بنحلم بي وطن شامخ 
سلام وعداله حريه
وطن يسع الجميع مرحاب
لا حزبيه
 لاجهويه
 لاقبليه
وطن متعدد الاعراق
نعمرو بالصنايعيه
نزرعو طيب حنيه
مواردنا الطبيعيه
نيل شاقي البلد نصين
اراضي الخصبه طينيه
مواشي وثروه سمكيه
مستف بالمعادن ست
غابات واسعه مطريه
مناخات عده متباينه
مناطقنا السياحيه
شعب اصيل شهم نبيل مترع بالاريحيه
 والشفاته جيل واعي
 مدرك ابعاد القضيه
والكنداكه ست الجيل
مسلح بالعلوم هيه
نبني نوحد النيه
علي وطن الجدود ننهض قبيلتنا سودانيه

شيلي عيني لو تريدي
ليكي نبضي مع وريدي
لوطلبتي الروح بترخص
ليكي حبي معاهو ريدي
يامني الروح يامناها
يا اغاريدي ونشيدي

غاية مناي نتلاقي في طرف البحر
تحكيلي عن نفس الشخوص نفس القصص
اشتقت ليك واشتقت  انا لي ضحكتك وللبراءة ونور وشيك

شمالي المنابع شرقيو الهوي
نشتاق للدميره  ولي العجوه ام نوي
عشقنا سلات بي عجوه والقهوه ام دواء
نحب لبن الابل حتي الارتواء
نطرب للربابه والبيبوب هوي
نصري وسيدي دوشكا الاتنين سواء
يعدلو للمزاج وللارواح دواء

ياخي حالاتكم تحنن
داك يشعر بالكابه
وديكي تشعر بالرتابه
وديكا محرومين
غلابه
وتلك تشعر بالتعاسه
وذاك يشعر بالقلاسه
انطفت صاج العواسه
ولعت نار السياسه
صرنا نشعر بالخساسه
المحاصصه والمخاصصه 
وداك يضحك بي خباثه
كل زول داير الرئاسه

ﻣﺎ ﻣﺤﺘﺎﺟﻪ ﻋﻴﺪ ﻳﻤﻪ

ﻋﺸﺎﻥ ﻣﺎ ﻧﺤﻨﺎ ﻧﻔﺮﺡ ﺑﻴﻚ

ﺩﻭﺍﻡ أﻳﺎﻣﻨﺎ ﻛﻠﻬﺎ ﻋﻴﺪ

ﺳﻌﺎﺩﺓ ﺍﻟﺪﻧﻴﺎ ﻓﻲ ﺣﻮﻟﻴﻚ

ﻧﺤﺲ ﺑﺎﻟﺮﺍﺡ ﻭﻧﺤﻨﺎ ﺣﺪﺍﻙ

ﻭﻗﺎﻟﻮ ﺍﻟﺠﻨﺔ ﻓﻲ ﻗﺪﻣﻴﻚ

ﺭﺿﺎﻙ ﻳﺎ ﻏﺎﻟﻴﺔ ﺳﺖ ﺍﻟﻜﻞ

ﺣﻠﻢ ﺟﻮﺍﻳﺎ ﻧﻔﺴﻲ أﺭﺿﻴﻚ

ﻭﻣﻬﻤﺎ ﻋﻤﻠﺘﺎ ﺷﻦ ﺳﻮﻳﺖ

ﺑﺮﺿﻮ ﺑﺴﻴﻂ ﻭ ﻣﺎ ﺑﻜﻔﻴﻚ

 ﻗﺪﺭﻙ ﻋﺎﻟﻲ ﻓﻲ ﺟﻮﺍﻱ

ﺳأﻟﺘ ﺍﻟﻤﻮلى ﻟﻲ ﻳﺤﻤﻴﻚ

ﻭﻳﺨﻠﻴﻚ ﻟﻲ ﺣﺒﻴﺒﺘﻲ أﻧﺎ

ﻭﻣﻦ ﺍﻟﻜﻮﺛﺮ ﻫﻨﺎﻙ ﻳﺴﻘﻴﻚ