كلمه منك حلوه  

تزهوا بي واسرح

في عوالم حالمه

زاهيه باهيه واسمح 

وبرضو منك كلمه

عادي ممكن تجرح

 للمشاعر تذبح

ياجميل لو تسمح

ماتبرر وتشرح 

لي لسانك اجمح

وانتقي الكلمات

اللطيفه واسمح

اسامه سعيد ابو الباشق

كرونا مابتكتل
تكتل اشاعاتكم
في ناس تموت بالخوف
بي سبب رواياتكم
خليك ايجابي
اتحري واتاكد
قبل ما تنقل ساي
في المصدر اتشدد
ما كل زول بينقل
معناه زول موثوق
في ناس بتلفح ساي 
بلاهي أصبر وروق
ما تبقي زول شمشار
تنقل تجيب لينا
تلقط الاخبار
السمحه والشينه
في ناس علي الهبشه
صابره وممكونه
ممكن تروح فيها
وتبقي السبب انتا
ودي موته مرهونه
بتتعدد الاسباب
والموته مضمونه
خاف الله في خلقه
ماتبقي زي سونا

#قصاصات ملقيه #
يارب يا كريم من ريدها بس تهديني
ام صورة تراري و ما بتغيب من  عيني
عندها طيف غريب عز المنام  بيجيني
يسهر بي لا عند الصباح يهريني
في الشوق والحنين ضيعتا عمري
سنيني
حب الجاهله كاتلني ومطلع عيني
ام وجها صبوح براقه زي الصيني
ان بسمت برق يشلع اقول يشويني،
وان ضحكت تفرح تسعد البائسين 
الشافك سعيد يازهرة الياسمين
والمحروم جفاكي عمرو كلو حزين

# اسامه سعيد ابو الباشق #

ست البيت 2020

المحبوبه مي الحنكوشه
ممشط راسا مي منكوشه
هادئه رزينه مي مهبوشه
ما الواتسابه مي الفسباكه
تفرك الويكه بالمفراكه
تطحن عيشها بالمحراكه
دي في مشيها ما بتتاكا
دي الما بتاكل الاندومي
تغسل بي ايديها هدومي
ما بتزعجني تقلق نومي
ما بتزعجني جيب شوكلاته
طيبه حنينه مي غالاطه 
ست البيت دي ام اولادي
تعمل اي شئ  لاسعادي
مي النضامه زي الرادي
كل يوم في المقام تزدادي
ساكنه الروح وجوه فؤادي 

اسامه سعيد ابو الباشق
مع الاحترام (ود الرضي )

وباء الفرح
بتين يجينا وينتشر
العدوي تدخل  كل بيت
ما تخلي زول ما تمسكوا
نضحك برانا ونبتسم
نضحك من الاعماق عديل
طولنا نحنا من الفرح
اشتقنا ياخ لي القهقهه
ولمتنا في شاي الصباح
والقهوه زاتا مجهجهه
#اسامه سعيد ابو الباشق#

حرام عليك تجفا
تتغابي في العرفه
 ياسارق اللهفه
زول كان بيحلم بيك
متخيل الزفه
اذيت مشاعر كان 
تهواكا بي عفه
خليتو يبكي وراك
دمع العيون جفا
عيشتو في اوهام
مصنوعه بي حرفه
سقيتو كاس المر 
خليتوا في الضفه 
ضيعتا اجمل ريد
لاقيتوا بالصدفه

#اوراق ملقيه #
#اسامه سعيد ابو الباشق#

ابوي دخري وسحابة الصيف
مستف بالكرم ستيف
نحر عنز اللبن للضيف
خريف عقب الجفاف التام
قشاش دمعة الايتام
جبار للخواطر دام
حلال للشبك هو دوام 
ابوي ترياق المرض والسام
كان حرت بقيف قدام
كرم اخلاقو ما لاقاني
لا دقاني  يوم زلاني
بحكمه وفهم رباني 
بي صلة الرحم وصاني
اكرم اهلي كل جيراني
اسال ربي يصبح هاني
في عالي الجنان يلفاني 
اكرمو يا كريم ما يعاني
نور قبرو يا رحماني

#قصاصات ملقيه #
كنتا دايما متصل
مالك بقيت دايما غياب
يسعد صباحك ياجميل
مفتقدو  ردك ياعذاب
مالو الصباح بقي ما حلو
حتي الطيور ابت الاياب 
وبقيت  يائس مكتئب
ماحياتي من غيرك يباب
لاعندي دافع لا امل
فجاءه اتقفل بيناتنا باب
لا كلمه حلوه من الصباح
لابقيت كيف لا مساك طاب
لا احساس جميل وشعور نبيل
يباس قلب وجفاف مشاعر  واغتراب
مامشكله انك تغيبي وترجعي
المشكله انك تجي وتلقيهو طاب
نساك عديل شفت جروحو وليكي ساب
يالكنت دايما متصل
ورجعت دايما متصل
البينا كان كاس ايس كريم
 يا حليلو داب

#ابو الباشق #

+مشطوها البشتنه   
 ياجمالا حلات بنتنا 
سمحه زينه يحفظها ربنا 
ست ابوها ولادة الهناء
خرجوها تمشي المدرسه
حياتنا قبلك ما اتعسها
ياحلاتا حبيبة القسي 
روح ابوها تبقي مهندسه 
او طبيبه تبقي مدرسه 
نشوف جديدها تبقي معرسه
نشوف صغارها ربنا يحرسها

اقبض طرف توب السعاده
اوعي برد الهم يضربك
اقبضو اتحاوي فيهو
ارجي ربنا بيسعدك
اسعي و اوكل كل امورك
تلقي جنبك يسندك
الحزن وان طال بيرحل
ان سعيتو بيمرضك
يجردك من الاماني
من كل جميل راح يبعدك 
ببقي حارسك يرصدك
اضرب الهم بالفرح
وعيش حياتك ودنيتك
ازرع الحب والتفاؤل
تجني راحة مرقدك
بالامل في الله وحدو تلقي غاية مقصدك
ماتامل في بشر ماعندو ليك شئ بيوعدك
و يخذلك ليك ما بيوفي حتي ممكن يحسدك
رغم المراره دي الحقيقه

البحظرك دا اكيد شقي
وين انت زيك بتلقي
ياصفوة العسل النقي
غالبا تكون حصلت غلط
وهسي بيكون سافي التراب
وياجنا ياركب الزلط
معقول يحظروك يالسمح
يااحلي من لون القمح
بعدك بيكون يوم ما فرح
معقول يحظروك يا ام وجن
يالفرصه يا خلاصة اللبن
البحظرك يمشي المصحه او السجن
# اسامه سعيد ابو الباشق  #

ههههههههه يا حليل زمن المدرسه دي ورقه في كراس قديم
# اوراق ملقيه #
رجيناكي انا واشواقي واللهفه
حنسنا الصبر يقعد زهج قالينا ياخي كفي
فضلنا وشوقي منتظرين ملت و فاتت اللهفه
وحتي اشواقي خلتني براي واخدت اللفه
رجيتك والامل جواي لكن المكان طفي
رحل حتي الامل سابني ولمن طالت الوقفه
جدعتا علبة البينسون قعدتا دنكلتا لي سفه

وكتين وصلت الاربعين
خليك زول راسي ورزين
شوف بيت حلالك واستعين
بالمولي رب العالمين
ماتبقي زي عبد المعين
طول يومو حاشي البنطلون
ولون القميص يا الله عين
صبغة شعر وكريم يدين
سلسل دهب ولبانتو طق طق يا معين
وطول ليلو حايم في البحر
داير يشاغل ناس سحر
شغال يوزع في الرقم
للجكسي والكناس يخم
شايلو موبايل كبير مفتاح وعامل زول مهم
يوم بالغلط جدع الرقم للبت منال
ضربتو كان راجل تعال
بالباب عديل زي الرجال
اطلبني زوجه وام عيال
قاليها يابت الحلال
طلبك محال
لاني راجل ابوعيال
ابوعيال
مادمت انت ابوعيال
مالك بتلعب بالحبال
حايم مباري ليك جهال
ياعمو مالا زوجتك
والله حلوه وست جمال
طيبه وخلوقه وبت رجال
طيب اكيد فيك الغلط
طايرات عيونك  ياكمال
الزيك انت مفروض يزال
من الارض ويمشي الجبال

#قصاصات ملقيه #

اقداري لو لي فيها ايد والله كنتا بغيرا
ويالسمحه لو لوكتي الصبر
ظروفي جاري ابدلا
وريني كت لاحق شنو
خلاك تبيع زول اشتري
*************
والله كنتا رويحتي فيك
عاشقك متيم مشتهيك
احلامي كانت ليك وبيك
رغم الحصل ما بكيت عليك
لاني صدمتا فجعتا فيك 
*****************
اكبر مشاكلك تحسبا
وصوت العقل عندك ابا
وحسمتا امرك وضربا
وكانت نتيجتك مرعبه
********★*★★
واكبر مشاكلي معاك كيف
بتختني لي زول رزيف
ان شاء الله تسعد ياحريف

بنيه شرقية الملامح
في مشيها  كمهر جامح
تلفتك بالرغم عنك
تجبرك تنظر تصابح
بسيطه ما متكلفه
انوثه طاقيه مع الكوابح
والعيون من خلف توبها
تخبرك باقي الملامح

ياسمحه صورتك ظلمتك
كان دهشه يوم شفتك عديل
كان حاجه اغرب للخيال
بل حاجه زي المستحيل
مابين مصدق ومندهش
مابين مكذب ومستحيل
معقوله انسانه وبشر
ولا انت جن ضل السبيل
عجبك شنو في خلقتي
وريني يا حلمي الجميل
يانجمة وقعت ولعت
ضؤت ظلام ليلي الطويل
واحترتا حار بي الدليل
مابين جمالك وروعتك
والفتنه و الحسن الاصيل
اعجبتا بي صنع الجليل

************** 
سرحتا مره مع الحواجب
والف مره مع العيون
وخشيمك الفات العنب
رقه ونداوه حلا ولون
وحتي البياض الفي سنون
زي لونو مالاقاني لون
والبشره زي لون الدهب
والحكمه وجنات فيها نون
وحديثها زي صوت الكمان
هادي وحزايني وكيف حنون
بديت افكر انسحب
قبال زماني لي يخون
فتشتا لي درب المروق
مالقيتو خانني العيون
ماقدرت انطق فد حرف
لاقدرتا اضحك ياحنون
ياحاجه فوق الاحتمال
ياحاجه لايمكن تكون
احسن افارقك هسي دي
قبال اصدق ولي ما تكون
قررتا ابرح  سكتك
قبال اصاب يوم بالجنون

جميل وراقي مرهف
رقيق فتان واهيف
عيون اذتني ضمه قلبي قرب يوقف
زينون رموشا اصلي جهرني لما رفرف
لو بسم تكلم حديثو كالبلال ومن الكناري اظرف
 جسيم نديان و ناعم  من القطيفه الطف
قتلني بالمعاطف وجوز سلاح مستف
تتني في مشيها طبيعي ما مزيف
دلال غنج طبيعي تحسو ما مكلف
وسط تلال ووديان خصر عرضو كالكف
وللبدور يقارن من لوشي زاتا اقيف
والباقي ما بقولو بخاف تقيفو في الصف

نجاضه ياست البنات
ياخ هيترك كم الف واط
حرق سلوكنا وليها جاط
الارضي lose فاقد الرباط
الجاءك قريب اتوفي مات


السمحه ياست الحريم
لابدره لاجل لا كريم
يا الحلوه لو عندك فريم
غطي الجواهر كون رحيم
لايجهرنو يقوم  اهيم
بي شخصك الراقي الفخيم

خليك بعيد ماتكون متاح
قربك شقي وبعدك كفاح

لنساء الكون قاطبة
 تحياتي
ارفع قبعتي فخرا
لوجودك امي بحياتي
 اعظم امراة اعرفها
في الزمن القادم والاتي
يامن منها عرفت الحب
وبحبها تهتف خلجاتي
ضحت من اجلي واخواتي
بجميل العمر ولم تبخل يوما
 اهدتنا احلي السنوات
لاندري متي كانت تحزن
دوما تهدينا البسمات
وتقهقه دوما ضاحكة
تسخر من زمن النكبات
لاتظهر ضعفا او حزن
حتي في اقسي اللحظات
 امي ياحبي ياعمري
اهديكي اكبر باقة ورد
في عيد المراة يا حياتي
وكذلك حبي قبلاتي

سلامتك يمه بعد الشر عليكي
يانبع الحنان رب العباد يشفيكي
يانور العيون من الوجع يبرئيكي
ولو بالايد وممكن والله العظيم افديكي
ولو بالمستطاع  جسمي بيشيلى الفيكي
او كان بالقروش  ترخص قليله عليكي
كفاره ذنوب عافيه واجر تكسيكي
 وعكه صغيره ماكنت تاثر فيكي
ولو ماكان شديد حبة وجع ترميكي
بعد دا الحال تقومي رب العباد يشفيكي
يا اطيب قلب وعندك عفو والديكي