الخميس، 14 ديسمبر 2017

رغم الظروف رغم المحن
لسه بنحبك ياوطن
نهواك نعشق وليك نحن
نشقي  ونتحدي الزمن
لانو ماعندك زنب
فيما جري ولينا صاب

رغم المكابده والصعاب
هوينا لي ريحة والتراب
قاسينا عانينا. وبكينا
كملن دموعنا املنا خاب
فترنا من كتر الوعود
وامال معلقه بالسحاب
مره تضوي وكتير ضباب
اهو نيلنا لا كلا لاملا السفر
لايوم  تعب لا مره غاب
 يوماتي بنص الفيافي والصحاري والهضاب
يهب الحياه ودايما شباب
لاشال جواز لاعندو نية اغتراب



مافي داعي تلف تدور حقو تبقي قدر كلامك 
كلما تحاول تبرر عندي تفقد احترامك
سيبني ابعد مابلومك مابفيدني اكيد ملامك 
بلوما نفسي لاني ردتك ريده اكبر من مقامك
ريده من جواي نابعه   ريده ما بتشبه غرامك
افتكرتك تحتويني والقي عطفك و اهتمامك
ياخسارة حبي ليك
 والمشاعر الضلو ليك
ويا خسارة احساسي بيك
وكل زمن ضيعتو فيك
ماتظن قاعد ابكيك
قاعد ابكي عشمي فيك

الأربعاء، 29 نوفمبر 2017

ما اظنو زماني يضحك
 وتبتسم دنياي تاني
بعد ما فارقت حبي
انفرط عقد الاماني
انقطع حبل السعاده
وانكشح عطر المعاني
وانهزم  خيل العواطف
وانذبح بطل التفاني 
قولي كيف البسمه تطلع
نبتهج من جوه تاني
وكلما افتكرك دموعي
تنهمر ينهز كياني
وكل لحظه تمر بدونك
  كيف بعيشها وكيف بعاني
بفتكر لوكنتا جنبي
كنتا ببقي سعيد وهاني
 بي وقود زكراك عايش
ولسه تاعباني الاغاني

الأربعاء، 8 نوفمبر 2017

#قصاصات ملقيه #
بتبكي بعد ابيتني براك
بعدما تعبتا من حبك
بعد تعبي وجري وراك
تقولي اجري بستناك
و بتجاوب بعد دا معاك
ليه فاكراني مجنون بيك
وشايف الدنيا في عينيك
لا ياحلوه غلطانه
اظني فاكراني ضبانه
يهشوها وترك ترجع
لا ما برجع
وما برك تاني في حبك
وبسيب الدنيا لو دربك
اموت عطشان اموت غرقان
ما اشرب بي كوب ختيتي في شفتيك
بطبز عيني لو نظرت سهوا ليك
ضعف نظري وابيت العدسه
عشان خاتاها في عينيك
كرهت الدنيا في عينيك
وبرضو الموت لانو الموت
بيحصل لي وبيحصل ليك

الثلاثاء، 7 نوفمبر 2017

الغفران الصعب

قدر ما حاولتا اغفر
للعملتو معاي انسي
رغم انو الفتره طالت
كانو حاصل لي هسه
بتوجع تمسكني مغصه
في الحلق تخنقني غصه
وفي القلب تذبحني
في الطريق لمن اشوفك
 والعيون تفضحنا  نقسي
 نمنع الدمعات ونعصي

وندعي الرضي والسعاده
والقلوب من جوه تعصي
نعصرها ونديها قرصه
اصلو مانديها فرصه
عشان تدق نديها عفصه

كانو ماكان بينا ريده
 ولاحصل بينا احلي  قصه

الأربعاء، 16 يناير 2013

الحب المفجوع

برنده برش زيرين وعنقريبين وكانون صفيح خمسه جدادت وديك غنمايه وسخيلتين الجو سخانه لمن غلط بطلنا منجدع في احد العنقربين تاكل سفه بي مزاج وبيسمع في اغنية من الموبايل الصيني ابو شريحتين
والفنان يلعلع
طاعني دايما بي وراء قاصد محبتي تخسرا
صبرك علي والبعملا فيك لمن تموت تتذكرا
.فاااااااااكر خيانتك لي زمان الليله بمرق دفترا
الليله بمرق ليك كلام هدم العلاقة ووترا .
قلبك قسي وظلم الغرام قلبك عديل كده كترا
اديته حبي ودنيتي لكنو للأسف إفترا
لازم آضوقك العذاب لازم أشوف دمعك جرى
وأخليي بي دمعك عواطفك تبقى ماتحجره
وتندم علي السويتو لي وتندم على كل ماجرى
بركان زعل جواي وقام نيرانو صدك فجره
حخلي يومك كلو هم وايام هناك متعثره
ولو فيك قام شتل الفرح بقلع عروقو وآكسرة
ولو ضحكت الأيام معاك دي ضحكة شماته ودي فسره
البسمع في قصه حياتك يقول دي قصة مؤثره
ينتفض مع اخر مقطع من الاغنيه وكانوا شيطان ضربوا في كوشه يتذكر كيف انتهت علاقته بمحبوبته الغادره كلتوم التي باعته وباعت غرامه بثمن بخس مع ود الجيران المربرب القادم من الخليج بي دسته بنطالين جنز ودسته فنايل ملونه جاءت وقالتليهو اسمع يا ادم الشئ البينا دا محكوم عليهو بالعدم لانو حب لا يمتلك مقومات النجاح ومعينات الاستمرار  مفتقد الدعم الخارجي وحب خالي من الرومانسيه والهدايا والورود والعزومات في الكافتيريات الفخمه يعني بي صراحه كده انا عايزه انسحب لاني بي صراحه تعبت من المشي معاك كداري واكل التسالي ووعودك المستحيل تتحقق في القرن دا الا بي معجزه وانت ياود الناس حتي اذا اتخرجتا بامتياز مستحيل تشتغل لانك ماعندك واسطه عشان كده ياودالناس انسي انك عرفتني في يوم من الايام بالمناسبه دي حاجاتك الجبتها لي وناولته كيس نايلون فيهو 150 جواب واول قرطاس تسالي قدموا ليها وانطلقت بي اسرع ما يكون تركته فاغرا فاه لا يلوي علي شئ
كل يوم يمر عليه هذا المشهد وهو منجدع وتاكل سفته وهو يستمع لهذه الاغنيه التي يجدها تعبر عن حالته وتحكي قصته
         لايخرجه من هذا الجو الا صوت والدته الحنون تدعوا له بالتوفيق والهدايه وتحاول ان تخفف عليه بكلمات

انشاء الله بكره لمن تتخرج ياولدي تغير حالنا دا تسكن في البيت السمح ونشرب المويه البارده من الثلاجه وننوم في المكيفات ونعرس ليك بنت خالك عشان تبقي لي بت ومرة ولد تملا البيت دا عيال ولاد وبنات يقوليها مجاملا انشاء الله يايمه وتنزل من عينه دمعه وتخرج من صدره اهة حرقه فتربت علي كتفه وتقوله عند الله مابعيد

شباب اليوم رجال الغد

يطلب بعض الشباب صداقتنا في الفيس بوك فنقوم باضافتهم لاصدقائنا

 علي عاده الفيس بوك عندما تضيف صديق يبداء في عرض قائمة اصدقائه واهتمامته والمجموعات المضاف اليها صديقك عليك ربما تعرف احدهم  لطلب صداقته  والمجموعات ربما تنضم لاحدها
  عندما يبداء عرض تحديثاتهم عليك تتفاجاء عديل كده بالصفحات البدات تظهر علي صفحتك والمنشورات البدات تظهر علي حائطك وخصوصا الاصدقاء اليافعين علي سبيل المثال لا الحصر

 بالله عليكم تاملوا  اسماء  الصفحات والقروبات دي
مساطيل لكن بي فهم - مساطيل لكن بنحبهم - بنحب بعض بس موش لبعض-الجكس ظريف لكن داير مصاريف - الجكس تعبنا وضيع زمنا - الجكس الباير ذي الحمام الطائر
والكثير المثير من هذه الشاكله والصفحات الغريبه والعجيبه التي تستدعي التوقف عندها ويصيبك الفضول لمعرفة الحوارات التي تدور بين جنباتها
ادهشني انقطاع تواصل الاجيال بيننا والاجيال التي تلتنا وبعدنا الكامل عن تفهم مايدور في رؤؤسهم وكيف يفكرون ويخططون للاتي فشباب اليوم هم كل المستقبل وسنجني ما كسبت ايدينا غدا من تركهم تائهين حائرين يتعرضون لغزو ثقافي وافد بدون تمليكهم اسلحه تعينهم علي عبور هذه المرحله العمريه بسلام والمقصودين هم اخوتنا الصغار وابنائنا سندنا وعزوتنا وامان شيخوختنا