الاثنين، 18 ديسمبر 2017

ياقلبي شان تعرف تعيش
بطل وهم وطنش طنيش
لومره قابلت السمح
اكتل ملف وخليك بريش
مالك ومالك وجع القلب
الحب صعب  بقي نار عويش
تسهر تقاسي وتبتئس
 ياخ  مافي حب بقي اكل عيش
تهدي وتعلم و تشتري
يجي مغترب جاهز ينيش

الخميس، 14 ديسمبر 2017

نحنا اتخلقنا عشان نحب
بالريده نسعد وننتشي
الريده ترياق  القلوب
واجمل درب سواء يتمشي
مرات نضل نلقي الدسايس والكروب
نقول نتوب ما بنتعظ  و نرجع نذوب
لدغ النحل مابخوف الضاق العسل رغم الخطوب
لكن يظل درب العشق احلي الدروب
رغم الظروف رغم المحن
لسه بنحبك ياوطن
نهواك نعشق وليك نحن
نشقي  ونتحدي الزمن
لانو ماعندك زنب
فيما جري ولينا صاب

رغم المكابده والصعاب
هوينا لي ريحة والتراب
قاسينا عانينا. وبكينا
كملن دموعنا املنا خاب
فترنا من كتر الوعود
وامال معلقه بالسحاب
مره تضوي وكتير ضباب
اهو نيلنا لا كلا لاملا السفر
لايوم  تعب لا مره غاب
 يوماتي بنص الفيافي والصحاري والهضاب
يهب الحياه ودايما شباب
لاشال جواز لاعندو نية اغتراب



مافي داعي تلف تدور حقو تبقي قدر كلامك 
كلما تحاول تبرر عندي تفقد احترامك
سيبني ابعد مابلومك مابفيدني اكيد ملامك 
بلوما نفسي لاني ردتك ريده اكبر من مقامك
ريده من جواي نابعه   ريده ما بتشبه غرامك
افتكرتك تحتويني والقي عطفك و اهتمامك
ياخسارة حبي ليك
 والمشاعر الضلو ليك
ويا خسارة احساسي بيك
وكل زمن ضيعتو فيك
ماتظن قاعد ابكيك
قاعد ابكي عشمي فيك

الأربعاء، 29 نوفمبر 2017

ما اظنو زماني يضحك
 وتبتسم دنياي تاني
بعد ما فارقت حبي
انفرط عقد الاماني
انقطع حبل السعاده
وانكشح عطر المعاني
وانهزم  خيل العواطف
وانذبح بطل التفاني 
قولي كيف البسمه تطلع
نبتهج من جوه تاني
وكلما افتكرك دموعي
تنهمر ينهز كياني
وكل لحظه تمر بدونك
  كيف بعيشها وكيف بعاني
بفتكر لوكنتا جنبي
كنتا ببقي سعيد وهاني
 بي وقود زكراك عايش
ولسه تاعباني الاغاني

الأربعاء، 8 نوفمبر 2017

#قصاصات ملقيه #
بتبكي بعد ابيتني براك
بعدما تعبتا من حبك
بعد تعبي وجري وراك
تقولي اجري بستناك
و بتجاوب بعد دا معاك
ليه فاكراني مجنون بيك
وشايف الدنيا في عينيك
لا ياحلوه غلطانه
اظني فاكراني ضبانه
يهشوها وترك ترجع
لا ما برجع
وما برك تاني في حبك
وبسيب الدنيا لو دربك
اموت عطشان اموت غرقان
ما اشرب بي كوب ختيتي في شفتيك
بطبز عيني لو نظرت سهوا ليك
ضعف نظري وابيت العدسه
عشان خاتاها في عينيك
كرهت الدنيا في عينيك
وبرضو الموت لانو الموت
بيحصل لي وبيحصل ليك

الثلاثاء، 7 نوفمبر 2017

الغفران الصعب

قدر ما حاولتا اغفر
للعملتو معاي انسي
رغم انو الفتره طالت
كانو حاصل لي هسه
بتوجع تمسكني مغصه
في الحلق تخنقني غصه
وفي القلب تذبحني
في الطريق لمن اشوفك
 والعيون تفضحنا  نقسي
 نمنع الدمعات ونعصي

وندعي الرضي والسعاده
والقلوب من جوه تعصي
نعصرها ونديها قرصه
اصلو مانديها فرصه
عشان تدق نديها عفصه

كانو ماكان بينا ريده
 ولاحصل بينا احلي  قصه