الجمعة، 20 سبتمبر 2019

ياخي حالاتكم تحنن
داك يشعر بالكابه
وديكي تشعر بالرتابه
وديكا محرومين
غلابه
وتلك تشعر بالتعاسه
وذاك يشعر بالقلاسه
انطفت صاج العواسه
ولعت نار السياسه
صرنا نشعر بالخساسه
المحاصصه والمخاصصه 
وداك يضحك بي خباثه
كل زول داير الرئاسه

الجمعة، 22 مارس 2019

ﻣﺎ ﻣﺤﺘﺎﺟﻪ ﻋﻴﺪ ﻳﻤﻪ
ﻋﺸﺎﻥ ﻣﺎ ﻧﺤﻨﺎ ﻧﻔﺮﺡ ﺑﻴﻚ
ﺩﻭﺍﻡ أﻳﺎﻣﻨﺎ ﻛﻠﻬﺎ ﻋﻴﺪ
ﺳﻌﺎﺩﺓ ﺍﻟﺪﻧﻴﺎ ﻓﻲ ﺣﻮﻟﻴﻚ
ﻧﺤﺲ ﺑﺎﻟﺮﺍﺡ ﻭﻧﺤﻨﺎ ﺣﺪﺍﻙ
ﻭﻗﺎﻟﻮ ﺍﻟﺠﻨﺔ ﻓﻲ ﻗﺪﻣﻴﻚ
ﺭﺿﺎﻙ ﻳﺎ ﻏﺎﻟﻴﺔ ﺳﺖ ﺍﻟﻜﻞ
ﺣﻠﻢ ﺟﻮﺍﻳﺎ ﻧﻔﺴﻲ أﺭﺿﻴﻚ
ﻭﻣﻬﻤﺎ ﻋﻤﻠﺘﺎ ﺷﻦ ﺳﻮﻳﺖ
ﺑﺮﺿﻮ ﺑﺴﻴﻂ ﻭ ﻣﺎ ﺑﻜﻔﻴﻚ
 ﻗﺪﺭﻙ ﻋﺎﻟﻲ ﻓﻲ ﺟﻮﺍﻱ
ﺳأﻟﺘ ﺍﻟﻤﻮلى ﻟﻲ ﻳﺤﻤﻴﻚ
ﻭﻳﺨﻠﻴﻚ ﻟﻲ ﺣﺒﻴﺒﺘﻲ أﻧﺎ
ﻭﻣﻦ ﺍﻟﻜﻮﺛﺮ ﻫﻨﺎﻙ ﻳﺴﻘﻴﻚ

السبت، 24 فبراير 2018

انت كيفي وقهوتي
وشاي المنعنع باللبن
ومعاك يتعدل المزاج
يالسمحه ياست الوجن
وين كنتي راجيك من زمان
يامنية الروح ياشجن
والليله حققتا المني
وبلقاءك ابتسم الزمن
يكفيني انك صرتي لي
وفؤادي عندك مؤتمن
بهواكي من زمن الصبا
عاشقك بحبك ليك بحن
معاك حسيت بالامان
في حضرتك ذهب الحزن
ياحلوه اسعدتي الفؤاد
والروح معاك لقت السكن
واليوم لقيتك يا مناي
حسيت مشاعري معاك بقن
زي كنت تايهه في الفضاء
ولقيت دوحك لي حضن

الاثنين، 18 ديسمبر 2017

انا خضتا في بحر الهوي
وكرتا غالبني المروق
لاقادر اكورك الحقوني
لاقادر اواصل فيهو اسوق
غايتو انكتب لي اكون غريق
يبلعني موج بحرك عشوق

اتشعبطا في شتلة هواك
وفضل معلق فوقا فوق
لاقدرتا احش زبيطتا
لاقدرتا احت انزل واضوق
ريدك سرح جوه العروق
ورويحتي قربت للمروق
قليبي ينخجا و يروق
حفيتا وراك قطع نعالي مليت شقوق
همت في صحرة هواك عشمان عواصفك لي تروق
ضعتا في عتمة جفاك ولسه منتظره الشروق
مين في سماحتك مين 
ياخاطف اللونين
حالي ودواعجك لين
مين زي نسيمك ووين
ياشتلة الياسمين
مبرومه كالوزين
جفاك دا  حدو بتين
مكحولة  العينين
 فؤادك امتي يلين
مكحولة  العينين
يرحم فؤادي حزين
امتي الوصال يارزين
وردية الخدين
 

يا شتله التفاح
طيبه وجمال وسماح
يامهرة الصلاح 
عزه ونفور وجماح
ليه تجفا دون ايضاح
من دون سبب وافصاح 
وتتركني بين نارين نار الهوي وجراح
واسرج خيولي افكاري فيما جري وايه طاح
هل مني كلمه صدرت كنت سبب لنواح
وكانو ما كان بينا  يوم لاهوي وارتياح
ياقلبي شان تعرف تعيش
بطل وهم وطنش طنيش
لومره قابلت السمح
اكتل ملف وخليك بريش
مالك ومالك وجع القلب
الحب صعب  بقي نار عويش
تسهر تقاسي وتبتئس
 ياخ  مافي حب بقي اكل عيش
تهدي وتعلم و تشتري
يجي مغترب جاهز ينيش

الخميس، 14 ديسمبر 2017

نحنا اتخلقنا عشان نحب
بالريده نسعد وننتشي
الريده ترياق  القلوب
واجمل درب سواء يتمشي
مرات نضل نلقي الدسايس والكروب
نقول نتوب ما بنتعظ  و نرجع نذوب
لدغ النحل مابخوف الضاق العسل رغم الخطوب
لكن يظل درب العشق احلي الدروب